Беларусь сёння

Беларусь з поўным правам можа лічыцца цэнтрам Еўропы, прынамсі дзякуючы свайму геаграфічнаму становішчу. Спакон вякоў наша краіна знаходзілася на перакрыжаванні Еўропы. І сёння па яе тэрыторыі пралягаюць самыя кароткія транспартныя шляхі, якія звязваюць краіны СНД з дзяржавамі Заходняй Еўропы. Беларусь мае агульную мяжу з Польшчай, Літвой, Латвіяй, Расіяй і Украінай.

Беларусь паэтычна называюць сінявокай, зямлёй пад белымі крыламі. “Белая Русь” – такое пранікнёнае, паэтычна пяшчотнае імя, якое вельмі падыходзіць нашай краіне. Абаянне Беларусі праяўляецца паступова: бяскрайнія пейзажы, якія нагадваюць акварэлі мастака, празрыстыя рэкі і азёры, прахалодныя лясы і сасновыя бары, сярэднявечныя замкі, маленькія вясковыя цэркаўкі, старажытныя паганскія капішчы… Усё гэта – Беларусь сёння. Гэта краіна гатовая адкрыць сваім гасцям цуд некранутай прыроды і дзіўнай гармоніі.

Але ў выгадным геаграфічным становішчы ёсць і вялікі мінус: Беларусь мноства разоў аказвалася полем бітвы. Кровапралітныя войны забіралі жыцці мільёнаў беларусаў. Але краіна заўсёды адраджалася і працягвала шлях да свабоды і незалежнасці. А нялёгкая гісторыя стагоддзямі выхоўвала асноўныя рысы беларусаў – працавітасць, аптымізм, міралюбнасць, талерантнасць і цярпімасць. Таму народ – гонар нашай краіны, яе душа!

На працягу стагоддзяў стваралася ўнікальная і самабытная беларуская мастацкая культура. Тут сфарміраваліся арыгінальныя архітэктурныя і мастацкія школы, ствараліся непаўторныя музычныя і літаратурныя шэдэўры беларускага мастацтва, якія дайшлі да нашых дзён, знаходзяцца пад аховай дзяржавы. Яны захоўваюцца ў калекцыях найбуйнейшых беларускіх музеяў. А класіку беларускай музыкі і драматургіі можна ўбачыць на тэатральных сцэнах і пачуць у шматлікіх канцэртных залах.

Сёння ў Беларусі кожны падарожнік знойдзе штосьці для сябе: ці вы любіце гісторыю або аддаяце перавагу сучасным забавам, ці імкняцеся да спакойнага сузірання або аддаяце перавагу актыўнаму адпачынку. Кожны турыст можа абраць у нашай краіне адпачынак на любы густ. 

І хоць у Беларусі няма заснежаных гор і цёплага мора з пясчанымі пляжамі, але летам тут можна пакупацца ў чыстых азёрах, а зімой пакатацца на лыжных курортах, і ў любую пару года – пабываць на рыцарскіх турнірах, народных святах, спартыўных спаборніцтвах, на фестывалях, у тэатрах, музеях і на шматлікіх экскурсіях. А для аматараў экалагічнага турызму адпачынак у Беларусі – унікальная магчымасць атрымаць асалоду ад прыроды ў экалагічна чыстых кутках. Асобнай згадкі заслугоўвае беларуская нацыянальная кухня. Вас здзівіць разнастайнасць страў і іх непераўзыдзены смак.

Сёння Беларусь прыцягвае сваёй самабытнасцю і гасціннасцю. Прыязджайце! І вам захочацца вярнуцца сюды зноў! Сардэчна запрашаем!